Bókasafn Víðistaðaskóla

Hlutverk Bókasafns Víðistaðaskóla er að styðja við kennslu og námsmarkmið sem sett eru fram í námskrá skólans. Einnig á safnið að vera lestrarhvetjandi fyrir nemendur og gera lestur að ánægjulegri upplifun. Þar eiga nemendur að fá tækifæri til að afla sér upplýsinga og nýta þær til þekkingar, skilnings og sköpunar. Bókasafnið á að vera lifandi staður til fræðslu og upplýsingaöflunar. Allir nemendur og starfsmenn skólans fá útlánakort sem skólasafnið gefur út og geymir. Útlánatími bóka er 30 dagar.

Safnkostur er fjölbreyttur og má þar finna bæði fræðslu- og afþreyingarefni. Þar er auk bóka, m.a. tímarit, bæklingar, myndefni og spil. Safnið veitir nemendum og starfsfólki greiðan aðgang að upplýsingum og heimildum. Gagnaskrá safnsins er í Gegni, sem er sameiginlegt bókasafnskerfi fyrir landið allt, sem Landskerfi bókasafna hf. sér um. Í Gegni er hægt að skoða hvað safnið hefur upp á að bjóða. Þar er möguleiki að leita heimilda eftir hugtökum og atriðisorðum sjá https://leitir.is

Allir nemendur skólans eiga erindi á safnið á skólaárinu. Þar fá þeir afþreyingarefni og ýmis námsgögn og eru t.d. námsbækur unglingadeildar skráðar í Gegni og lánaðar frá safninu. Safnið tekur þátt í ýmsum lestrarhvetjandi- og heimildaverkefnum og stendur fyrir höfunda- og bókakynningum yfir veturinn. Við alla verkefna- og hópvinnu leitast bókasafnsfræðingur við að eiga gott samstarf við umsjónar- og tölvukennara skólans.

Bókasafnið er opið mánudaga til fimmtudaga frá 8:00 – 16:00 en föstudaga er opið frá 8:00 - 14:00. Umsjón með safninu hefur Halla Ingibjörg Svavarsdóttir kennari og bókasafns- og upplýsingafræðingur.